Mēnā kei tētahi wāhi wātea i te wā ngaru taitoko, me whakaharatau koe i tō ara whakatahi, i tō ‘hīkoi ngaru taitoko’ rānei. Ko te hīkoi ngaru taitoko ko tētahi hīkoi e whai ai koe i tō ara whakatahi i te ngaru taitoko ki uta, ki te papa teitei rānei.

He aha te hīkoi ngaru taitoko? 

Ko te hīkoi ngaru taitoko ko tētahi hīkoi e whai ai koe i tō ara whakatahi i te ngaru taitoko ki uta, ki te papa teitei rānei. Mā te whakaharatau i tō ara whakatahi ngaru taitoko e āwhina kia hoki mai tō maumaharatanga ā-uaua ina puta mai he rū whenua, ahakoa he āhuatanga tino ahotea tērā.

E mōrearea ana te katoa o Aotearoa ki ngā rū whenua, ki ngā ngaru taitoko hoki. Ko te whakaharatau i tō hīkoi ngaru taitoko tētahi ara māmā māu, mā rātou e tata ana ki a koe kia ako i ngā mahi tika me mahi. Whakaharatautia tō hīkoi whakatahi ki te papa teitei, ki uta rānei mā raro, mā runga pahikara rānei.

Mēnā kei tētahi wāhi wātea i te wā ngaru taitoko koe, me whakaharatau koe i te whakatahi atu i taua wāhi.  

Te wiki hīkoi ngaru taitoko 

E mōrearea ana te roanga o te tapātai o Aotearoa ki ngā ngaru taitoko. Ka ākina e te wiki hīkoi ngaru taitoko a East Coast LAB ngā tāngata kia ako, kia whakaharatau hoki i tō rātou ara whakatahi i te ngaru taitoko.

Ko te New Zealand ShakeOut i te marama o Oketopa tētahi atu āheinga rawe māu kia whakaharatau i tō hīkoi ngaru taitoko.

East Coast LAB Life at the Boundary logo

Torohia te pae tukutuku a East Coast LAB kia whai mōhio mō te Wiki Hīkoi Ngaru Taitoko.

Me pēnei te whakaharatau i tō hīkoi ngaru taitoko 

Hihiratia kia mōhio mēnā rānei kei tētahi wāhi wātea i te wā ngaru taitoko tō kāinga, tō wāhi mahi, tō kura, tō wāhi hui hapori rānei. Whakamaheretia tētahi ara e kawe haumarutia atu ai koe i te wāhi. Whakamaheretia kia haere mā raro, mā runga pahikara rānei mēnā ka taea. Kei tō Rōpū Whakahaere o Te Rākau Whakamarumaru ngā mahere, ngā tohutohu mō ngā rohe wātea i te wā ngaru taitoko.

Whakatauria ka haere koe ki hea (ā, whakaritea kua mōhio te katoa o tō whānau ki tērā, kei kore koutou e noho tahi ana ā taua wā). Ko tō wāhi whakatahi pea ki te taha o ō hoa, o tō whānau rānei, nō reira whakaritea kua mōhio rātou ki ō mahere.

Whakaharatautia tō hīkoi ngaru taitoko ki te taha o tō whānau, o ō hoa mahi, o ō hoa ako rānei. He wā whakaharatau tino pai te wiki o te hīkoi ngaru taitoko, te Shakeout hoki. Mēnā he mōkai tāu, ka taea pea e koe te hīkoi tahi ki a ia ki tō ara whakatahi ngaru taitoko.

Rapua ētahi atu mōhiohio mō ngā ngaru taitoko 

Akohia me aha ā mua, ā roto, ā muri hoki i te ngaru taitoko.

Me mōhio ki ō wāhi wātea i te wā ngaru taitoko. Rapua ērā mā tō Rōpū Whakahaere o Te Rākau Whakamarumaru. Kei a rātou ngā mahere, ngā tohutohu hoki mō ngā wāhi whakatahi ngaru taitoko. Whakaritea kua mōhio koe me haere ki hea, ahakoa kei te kāinga, kei te mahi, kei te hāereere rānei koe.

Ngā momo matepā

He maha ngā matepā māori kei Aotearoa. Akohia me aha ā mua, ā roto, ā muri hoki i ia momo ohotata.