Ka mahi tahi ngā tini pokapū hei whakahaere i ngā ohotata, hei whakahaumaru i ngā tāngata. Akohia mā wai tēhea mahi i te ohotata.

Ngā Rōpū Whakahaere o Te Rākau Whakamarumaru

Ka whakahaeretia te nuinga o ngā ohotata paku e te ratonga ohotata hāngai. Hei tauira, ka whakahaeretia ngā ahi ā-whare e te Whakaratonga Iwi.

Kei Aotearoa hoki ngā pānga he paku ki te waenga te hōkai ka takea mai i ngā matepā māori pērā i ngā waipuke. Ka whakahaerehia ēnei e tō kaunihera ā-rohe, e ngā Rōpū Whakahaere o Te Rākau Whakamarumaru rānei. Kua hangaia ngā Rōpū Whakahaere o Te Rākau Whakamarumaru ki ngā kaunihera ā-tāone, ā-rohe ki tētahi takiwā.

Tekau mā ono ngā Rōpū Whakahaere o Te Rākau Whakamarumaru kei Aotearoa.

Civil Defence logo

Rapua tō Rōpū Whakahaere o Te Rākau Whakamarumaru (CDEM).

Te āhua o te ohotata ā-rohe

Ka hiahiatia e ētahi ohotata te pāhekoheko anō whakawhiti atu i ngā ratonga. Ki te pēnei, ka whakapuakitia pea tētahi wā ohotata ā-rohe. Ka tukuna e te wā ohotata ā-rohe ngā mana motuhake ki ngā Rōpū Whakahaere o Te Rākau Whakamarumaru ki te whakahaere i te ohotata.

Ka tukuna e te wā ohotata ā-rohe te whakahaeretia e ngā Rōpū Whakahaere o Te Rākau Whakamarumaru o te urupare ki te ohotata. Kei roto i tēnei:

  • ko te ruruku i ērā atu ratonga ohotata
  • ko te whakarite kia wātea mai te nōhanga taupua, te kai, te wai hoki
  • ko te whakarite e tika ana te whakahaere i te āheinga ki ngā wāhi mōrearea, ā,
  • ko te tuku i ngā karere mōhiohio tūmatanui auau.

I ētahi wā ka āwhina pea ngā Rōpū Whakahaere o Te Rākau Whakamarumaru ahakoa kāore i te whakapuakitia tētahi wā ohotata.

Te wā ohotata ā-motu

Mō ngā ohotata tino rahi, ka taea e te Minita mō te Whakahaere Ohotata te whakapuaki i te wā ohotata ā-motu. Ki te pēnei, ka mau i te Kaiwhakahaere o Te Rākau Whakamarumaru te mana whakahaere. Ka whakahaeretia te urupare e Te Rākau Whakamarumaru.

Ētahi atu mahi a ngā Rōpū Whakahaere o Te Rākau Whakamarumaru

Atu i ngā ohotata, ka āwhina ngā Rōpū Whakahaere o Te Rākau Whakamarumaru ki te whakarite kia aumangea ake ngā hapori. Kei roto i tēnei:

  • ko te mahi kia whakaheke i ngā mōrearea, i ngā matepā e pāngia ana e ngā hapori
  • ko te whakamahere mō ngā urupare ohotata, ā,
  • ko te ārahi i te haumanutanga ā muri i tētahi aituā nui.

He tata te mahi ngātahi a ngā Rōpū Whakahaere o Te Rākau Whakamarumaru:

  • ki ngā ratonga ohotataki ngā tari kāwanatanga 
  • ki ngā iwi
  • ki ngā kaituku rawa waiwai pērā i te hiko, i ngā whakawhitinga kōrero, i te kapuni; ā,
  • ki ētahi atu ka āwhina i ngā tāngata, i ngā hapori ki ngā urupare ohotata.

Kei ia Rōpū Whakahaere o Te Rākau Whakamarumaru tētahi Mahere Whakahaere Ohotata o Te Rākau Whakamarumaru. Me mātua whai te Mahere i ēnei:

  • ko ēhea matepā, ko ēhea mōrearea ka whakahaerehia e te Rōpū Whakahaere o Te Rākau Whakamarumaru
  • ka pēhea te whakahaere i ērā, ā,
  • te whakamahere rautaki mō te haumanu i ngā matepā, i ngā mōrearea.

Te Rākau Whakamarumaru

Atu i ngā ohotata, ka whakatairangatia e Te Rākau Whakamarumaru te aumangea nui ake ki ngā aituā. Ka whakahaerehia hoki e ia te pūnaha whakahaere ohotata o Aotearoa. Ka whakaritea e ia e mahi ana te pūnaha e ai ki te tūmanako, ā, ka tautuhia ngā ara hei whakapai ake.

Ka tautokohia e Te Rākau Whakamarumaru te māramatanga, te pāhekoheko hoki ā-rohe, ā-takiwā, ā-motu hoki. Kei roto i tēnei ko te kāwanatanga, ngā iwi, te kāwanatanga ā-rohe, ngā whakahaere tūmataiti, hapori anō hoki.

Mā Te Rākau Whakamarumaru:

  • e tautuhi ngā matepā, ngā mōrearea e hira ana ā-motu
  • e tuku tohutohu ki ngā Rōpū Whakahaere o Te Rākau Whakamarumaru, ki ētahi atu hoki mō te whakahaere ohotata, ā,
  • e aroturuki te ekenga o ngā Rōpū Whakahaere o Te Rākau Whakamarumaru.
Civil Defence logo

Rapua ētahi atu mōhiohio mō Te Rākau Whakamarumaru.