Ka aha koe ki te pakaru ngā waea ā-waea, ā-ipurangi rānei? Ka pēhea tō noho hono tonu, tō whakarite kia hui ngātahi, tō whai mōhio tonu ki ngā rongo kōrero, ki ngā matohi huarere?

Hei te nuinga o ngā ohotata, ko te tino painga ko te noho tonu ki tōu ake kāinga. Tohua tō kāinga hei tō wāhi hui, ā, me whai wāhi kē kei kore e taea te tae atu ki reira.

Ngā tino tīwhiri

Whakamaheretia tētahi wāhi hui

Kōrero atu ki tō whānau mō tā koutou whakapā tētahi ki tētahi, ā, hei hea koutou hui ai hei te ohotata.

Mēnā he tamariki āu

Whakaritea kua mōhio koe ki ngā mahere ohotata a tō kura, a tō pokapū kōhungahunga rānei. Tukuna ki a rātou ngā ingoa o ngā tāngata e toru e whakaaetia ana te tiki i ngā tamariki ki te kore koe e āhei ana te tae atu ki reira.

Stay tuned in

Me whai i tētahi reo irirangi ka whakahikongia e te hiko kōmaru, e te pāteri rānei kia hou tonu tō mōhio ki ngā rongo kōrero hou, ki ngā matohi hou. Me mōhio ko ēhea ngā teihana reo irirangi me rongo kia whai mōhiohio hei te wā o te ohotata.

Akohia me pēhea e noho hou tonu ai ō mōhiohio

He hoapā kei tāone kē atu

Me whai hoapā kei tāone kē atu, ā, kia mōhio te katoa ko wai tērā. I ētahi wā ahakoa kua weto ngā waea ā-waea ā-rohe, ka taea tonutia te whakapā atu ki ngā tāngata kei waho i tō rohe. Tonoa te katoa kia whakapā atu ki tō hoapā kei tāone kē atu mā te pātuhi, mā te karere tuihono rānei hei te ohotata mēnā ka taea.

Whakaritea tētahi rārangi

Whakaritea tētahi rārangi ā-tuhi o ngā tau waea hira.

Te pātuhi, te karere rānei

Hei te ohotata, ka tere kūkātia pea ngā waea ā-waea. Kia wātea tonu ērā kia taea te whakamahi i ngā waeatanga ohotata, ā, mēnā ka taea, whakamahia te pātuhi, te karere ā-tuihono rānei kia hono tonu.

Matapakitia ngā pānga

He mea āwhina kia puta atu koutou te mārama ki ngā pānga o te ohotata. Matapakitia ki ngā tāngata ki tō kāinga, ā, whakaritea ka aha koutou ki ēnei āhuatanga.