Kāore he hiko
Ka aha koe ki te kore te hiko mō ngā tini rā? Ka pēhea tō kite, tō tunu kai, tō noho mahana?
Ka pā pea ngā wetonga hiko ki ngā mīhini EFTPOS, ATM hoki, nō reira pupuritia ētahi moni ki te kāinga, ngā rawa e rawaka ana mō te toru rā, neke atu rānei.
Ngā tino tīwhiri
Me whai rama
Ehara i te mea me noho tō rawa ohotata ki tētahi kete, engari me rapu pea koe i ērā i te pōuri. Whakaritea kua mōhio te katoa kei hea ngā rama, ngā pāteri hoki.
Whiriwhiria ngā rawa ka hiahiatia
Noho mōhio tonu
Me whai reo irirangi ka whakahikongia e te hiko kōmaru, e te pāteri rānei kia hou tonu tō mōhio ki ngā rongo kōrero hou, ki ngā matohi hou. Me mōhio ko ēhea ngā teihana reo irirangi me rongo kia whai mōhiohio hei te wā o te ohotata.
Akohia me pēhea e whai mōhiohio
Whakaputuhia ngā kai
Me whai putunga kai me kaua e tunu (he pai ngā kai kēne), me whai mea rānei hei tunu i tō kai (he rorerore kapuni, he tō hopuni rānei). Kaua e wareware i te kai mā ngā pēpi, mā ngā mōkai.
Pouaka makariri i te tuatahi
Ki te weto te hiko, kaingia tuatahitia ngā kai mai i tō pouaka makariri, kātahi i tō pouaka tio. Kātahi ka kaingia ngā kai kei te kāpata, kei tō kete ohotata rānei.
Kōrero ki ō kiritata
Kōrero ki ō kiritata mō tā rātou mahi mēnā ka weto te hiko. Ka whai mōhio pea koe kei a rātou tētahi rorerore kapuni, ā, kei a koe pea te kai, te wai rawaka kia tuari (te tauaro rānei).
Matapakitia ngā pānga
He mea āwhina kia puta atu koutou te mārama ki ngā pānga o te ohotata. Matapakitia ki ngā tāngata ki tō kāinga, ā, whakaritea ka aha koutou ki ēnei āhuatanga.
