E kore e taea te matapae i ngā aituā, engari ka taea te whakarite mō ērā. Ko tētahi o ngā wāhi tīmatanga tino pai ko tō kāinga. Whai mōhio he aha ka taea e koe kia haumaru ake tō kāinga.

Ka pēnei te whakahaumaru ake i tō kāinga

He mahi ka taea e koe hei āwhina ki te whakaheke i ngā panga o tētahi ohotata ki a koe, ki ō rawa hoki.

  • Whakamahia ngā taiapa, ngā tarapu rānei hei whakamau i ngā taonga o te whare he teitei, he taumaha hoki ki ngā pou o ngā pakitara (wall studs).
  • Whakanekea ngā mea taumaha, marore hoki ki ngā pae, ki ngā kāpata kei raro iho.
  • Whakairia ngā pikitia, ngā whakaataata ki ngā hūka tika (kaua ki ngā nēra takitahi).
  • Whakaritea kua mōhio koe ki te wāhi o ngā pana whakaweto ohotata, o ngā kati aukati ohotata mō te kapuni, mō te pūtake matua o te wai hoki.
  • Ka nui ake te mōrearea o ētahi timera pereki, raima hoki kei tanuku hei te rū whenua. Tirohia te pae tukutuku a te Earthquake Commission mō ētahi atu mōhiohio mō te whakahaumaru ake i ngā timera.
  • Mēnā he tūāpapa ā-papa tārewa kei tō kāinga, me hihira e pai ana te āhuatanga. Hihiratia te pai o ngā hononga kei waenganui i ngā tūāpapa, i te whare o runga hoki.

I te marama o Pēpuere i te tau 2021, i whakatinanatia ētahi panoni ki te Residential Tenancy Act o Aotearoa. Nā ēnei panoni i māmā ake mō te hunga rīhi ki te whakahaumaru i ō rātou kāinga mō te rū. Mēnā he kairīhi koe, ā, kei te hiahia koe ki te whakahaumaru i tō kāinga mō te rū, whakaritea kia kōrero koe ki tō kaituku rīhi, ki tō kaiwhakahaere whare i te tuatahi.

Hononga ā-waho
Earthquake Commission logo

Toroa te pae tukutuku a te Toka Tū Ake ki te reo Pākehā mō ētahi atu mōhiohio mō te whakahaumaru ake i tō kāinga.

Hihiratia tō inihua

He mea tino nui kia whai kapi inihua koe mō tō kāinga, mō ō rawa o roto, kia hoki anō koe ki te ora mēnā ka pakaru ērā i te aituā. Waihoki, mā te whai kaupapa here inihua kāinga tūmataiti kei roto te kapi ahi (e pēnei ana te nuinga) e aunoa tō māraurau mō te hua inihua a EQC, arā mō EQCover.

He mea nui kia auau tō arotake i tō inihua. Ko ētahi mea matua me hihira ko ēnei:

  • He aha ka kapi i tō kaupapa here inihua, tae atu hoki ki ngā mea kāore e kapi ana.
  • Mēnā he rawaka tō kapi inihua kia hanga anō i tō kāinga, kia whakakapi i ō mea marihi ā muri i tētahi ohotata.

Ki te pā atu te whakakino i tētahi matepā māori ki a koe, kia maumahara kia kapo i ngā tini whakaahua. Kātahi ka whakapā atu ki tō kaituku inihua tūmataiti hei tuku kerēme. Mā rātou e arotake, e whakahaere, e whakatau tō kerēme katoa mō EQC, tae rā anō ki te wāhanga EQCover.