MafuieNgā Rū Whenua

E lamatia Niu Sila atoa i mafuie. E lē mafai ona valoia le taimi o le a tupu ai, ae e mafai ona tatou puipuia i tatou lava ma o tatou aiga. Saili i faamatalaga e te iloa ai gaioiga e fai a o lei tupu, i le taimi o tupu ai ma le uma ai o se mafuie.

Faaitiitia aafiaga o mafuie 

Ia saogalemu lelei lou fale. Toe faalelei ma faamau lelei mea e ono to'ulu ma e lavea ai pe a lūlū se mafuie.

Toe iloilo i taimi uma lau inisiua. E tāua le fai o se inisiua mo lou fale ma meafale auā le toe tau amata ia foi i se lelei pe a faaleagaina meatotino i se faalavelave.

Nofo sauni a o lei tupu se mafuie 

Fuafua mea tou te ono moomia ma fai faatasi se tou fuafuaga.

Faalua i le tausaga ma faataitai le Faapau, Ufiufi ma Pipii. E mafai ona e auai i faataitaiga nei pe a sui le uati ma e auai i le New Zealand ShakeOut. E tāua le faataitai o gaioiga sa'o e te iloa ai le mea e tatau ona fai, pe a lūlū mo'i se mafuie.

Vaai nofoaga e saogalemu e Faapau, Ufiufi ma Pipii ai i totonu lava o lou fale, aoga, galuega ma isi nofoaga e masani ona e asiasi i ai.

• O se nofoaga o lata ane ia te oe, e vave ona e tau ane i ai, e alofia ai se manu'a mai mea o felelei solo.
• Lalo o se laulau malosi. Pipii i vae o le laulau e taofi ai mai le lue ese ma le mea o e iai.
• Faamamao ese mai faamalama e mafai ona taei ma lavea ai. Faapena meafale maualuluga e mafai ona palasi ifo i ou luga. Tuu ou lima i lou ulu ma le ua e puipuia ai.
• E lē saogalemu faitotoa. O le tele o fale, e lē malolosi tele faitotoa e pei o isi vaega o le fale ma e mafai ona lavea i le ituaiga faitotoa e felueai pe a tatala.

Gaioiga e fai i le taimi o lūlū ai se mafuie

O le gaioiga sa'o e tatau ona fai pe a lūlū se mafuie o le Faapau, Ufiufi ma Pipii. E:

• taofia ai lou pasasa i tua
• faafaigata ai ona e lavea mai mea ua to'ulu ifo ma felelei solo, ma
• puipuia ai lou ulu, ua ma totoga tāua.

Aua e te tamoe i fafo auā e mafai ona e taia i piliki ma tioata o to'ulu solo.

Afai o lena e te tu lata i se matafaga manatua, Alu Ese Loa, pe a Umi pe Malosi.

• Faapau, Ufiufi ma Pipii seia uma lelei le lūlū o le mafuie.
• Afai e sili atu ma le minute le umi e lūlū ai se mafuie pe ua malosi tele ua faafaigata ai ona e tu, agai vave loa i se mati'e maualuga pito lata ane po o le agai tele i uta i le mamao e mafai ai mai sone galulolo.
• Saili i faamatalaga e te iloa ai auala e puipuia ai oe lava mai se galulolo.

Aoao le faiga o le Faapau, Ufiufi ma Pipii

Gaioiga e fai i le uma ai ona lūlū o se mafuie

Sauni e toe lūlū foi. O taimi uma e te faalogoina ai le lūlū o se mafuie, Faapau, Ufiufi ma Pipii. E mafai ona toe lūlū i minute, aso, vaiaso, masina ma ua silia ma le tausaga talu ona uma se mafuie.

• Vaai oe lava po o iai se lavea ma saili se first aid pe a moomia.
• Aua e te tamoe i fafo. E faaosofia le fefe i le nofo ai i totonu o se fale i le faatoa uma ai lava o se mafuie, ae e sili atu ona saogalemu totonu nai lo le alu i fafo. E lē pei se mafuie o le afi. E lē moomia ona e tuua vave i le taimi lava lea se nofoaga se'i vagana ua iloa ni faailoga o se faaletonu po o le moomia ona e alu ese mai sone galulolo o lena e te iai.
• Tapē le suavai, eletise ma le kesi pe afai na fautuaina le tulaga lea. Afai ua e sosogia le manogi o le kesi po o se mea e pa'ō pe ūū, tatala se faamalama, ō ese tagata uma i fafo ma tapē le kesi pe a e mafaia.
• A e vaaia mea e emoemo, uaea ua motusi po o mea e iloa ai ua faaleagaina mea tau eletise, tapē le pusa eletise pe afai e saogalemu ona fai.
• Afai e mafai, fai ni lavalava e puipuia ai oe e ufiufi ai ou lima ma vae, ma seevae malosi. E puipuia ai oe lava mai lou lavea i mea ua taei.
• Afai o e iai i totonu o se faleoloa, o se nofoaga mo fefaatauaiga e te lē masani ai po o luga o auala mo femalagaiga lautele, mulimulitai i faatonuga a i latou o taitaia tulaga nei.
• Faaaogā fesootaiga televavave po o feau e lafo i telefoni e faaavanoa ai laina telefoni mo valaau mo faalavelave faafuasei.
• Vaai lelei au fagafao. Puipui meaola mai lamatiaga ma puipuia isi tagata mai meaola o e vaaia.
• Vaai ou tuaoi ma soo se tasi e ono moomia lau fesoasoani.

Afai ua faaleagaina au meatotino

• Aua e te faia se mea e ono lamatia ai lou saogalemu pe atili leaga ai au meatotino.
• Faafesootai lau kamupani inisiua i se taimi vave e mafai ai.
• Afai e te nofo mautotogi, faafesootai lē e ona le fale ma le kamupani o inisiua ai au meatotino.
• Pu'e ata o soo se mea ua faaleagaina. E fesoasoani e faagaioi vave ai le iloiloina o au talosaga.