Ka ‘akape‘ea koe me kino te terepōni, e te ‘ātuitui roro uira? Ka ‘akape‘ea koe i te ‘ātui‘anga ki teta‘i atu, te ‘akatanotano‘anga no te teta‘i tuātau ‘ārāvei‘anga, me kore ra, te kite‘anga i te nūti ‘ōu, e te au ‘akamatakite‘anga no runga i te reva?
I roto i te ma‘ata‘anga o te au manamanatā tupu po‘itirere, e mea pu‘apinga rava atu, i te no‘o ki roto i to‘ou ‘uā‘orāi ngutu‘are. Ma‘ani‘ia to‘ou ngutu‘are, ei ngā‘i ‘ārāvei‘anga, ma te ‘akapapa i teta‘i ngā‘i kē atu, ko te kore a‘ea koe e rauka i te aere ki to‘ou ngutu‘are.
Komakoma atu ki to‘ou kōpu tangata no runga i te ‘ārāvei‘anga teta‘i ki teta‘i, e te ngā‘i ka ‘ārāvei kotou i roto i te tuātau manaanatā tupu po‘itirere.
‘Akapāpu meitaki kia kite koe i te au parāni no te manamanatā tupu po‘itirere o ta‘au ‘āpi‘i, me kore ra, ta‘au turanga ‘āpi‘i punanga. ‘Ōronga‘ia atu te ingoa o teta‘i tokotoru te ka tiki atu i ta‘au tamariki, me kare e rauka iākoe i te tiki.
Tikina‘ia teta‘i rātiō te ‘akatere‘ia ra, e te uira-rā, kia rauka iākoe i te āru i te nūti ‘ōu, e te au ‘akamatakite‘anga ‘ōu. ‘Akapāpu e kua kite koe i te au turanga tau no te ‘akarongo atu no te au ‘akakitekite‘anga i roto i te tuātau manamanatā tupu po‘itirere.
Kimi‘ia te rāvenga kite i te au mea tau kia rave‘ia
Kia kite te katoatoa i teta‘i turanga ‘ārāvei‘anga i teta‘i tei-va‘o-ake-i-te-‘oire I teta‘i taime, me kino te au niuniu terepōni, ka rauka rāi iākoe i te komakoma atu ki va‘o ake i to‘ou ngā‘i. Umuumu‘ia te katoatoa, kia komakoma atu ki to‘ou turanga ‘ārāvei‘anga i teta‘i tei-va‘o-ake-i-te-‘oire, na roto i te karere patapata, me kore ra, na runga i te karere ‘ātuitui roro uira, i te tuātau manamanatā tupu po‘itirere, me ka rauka iākoe.
‘Ākono‘ia teta‘i ‘akapapa‘anga numero terepōni pu‘apinga.
I roto i teta‘i manamanatā tupu po‘itirere, ka kī viviki te au niuniu terepōni. ‘Auraka e tamanamanatā, kia tae te au tāniuniu‘anga no te manamanatā tupu po‘itirere e, me ka rauka iākoe, ta‘anga‘anga‘ia te karere patapata, me kore ra, te karere ‘ātuitui roro uira.
Komakoma atu ki to‘ou ngutu‘are tangata, ma te ‘akatanotano i ta kotou ka rave, i roto i teia au turanga.