‘I ha taimi fakatu‘upakē, ‘e ‘i ai ha ngaahi ‘api, hala mo ha ngaahi kaungā‘api ‘e ala ‘ikai malu ke kei fai ha nofo atu ai pea ‘e ala fiema‘u ke mou mavahe fakavavevave mei ‘api.
Kapau ‘e fetukutuku homou hala, te mou ō ki fē? Ko e hā ‘a e me‘a te mou ō mo ia? Fefe ‘a e fanga monumanu lalata? ‘Oku ‘i ai homou ngaahi kaungā‘api te nau ala fiema‘u ‘a ho‘o tokoni?
‘Ai ha kato ke maau ma‘á e tokotaha kotoa pē ‘i ho fāmilí. ‘Oku totonu ke ‘i ai ha vala māfana, hina vai, fanga ki‘i me‘akai ma‘ama‘a, tatau ‘o e ngaahi me‘a fakapepa mahu‘ingá, mo ha ID ‘oku ‘asi ai ha tā. Manatu‘i ha fa‘ahinga faito‘o te mou ala fiema‘u. Tauhi ho‘omou nāunau ki he fuofua tokoní, kasa, letiō mo e maka kasa ‘i ha feitu‘u te mou lava ‘o to‘o fakavavevave mei ai kinautolu.
Fakakaukau‘i ‘a e ngaahi nāunau ‘oku mou fiema‘ú
Fakakaukau‘i ‘a e feitu‘u te mou ō ki aí (pea fakapapau‘i ‘oku ‘ilo‘i ia ‘e he tokotaha kotoa pē ‘i homou ‘apí, telia na‘a ‘ikai ke mou ‘i ai fakataha kotoa). Ko e feitu‘u te mou fetukutuku ki aí ‘e ngali nai ko hamou kaungāme‘a pe fāmili ia, ko ia ai, fakapapau‘i ‘oku nau ‘ilo ki ho‘omou ngaahi palaní.
Kapau ‘oku mou nofo ‘i ha feitu‘u ‘oku fiema‘u ke fetukutuku ‘i ha peaukula, fakapapau‘i ‘oku ‘i tu‘a mei ai ‘a e feitu‘u ‘oku mou fetukutuku atu ki aí.
‘Ilo ki homou feitu‘u ke mou fetukutuku mei aí ‘i ha peaukula.
Kapau ‘e fiema‘u ke mou mavahe mei ‘api, mou ō mo ho‘omou fanga monumanu lalatá. Kapau ‘oku ‘ikai malu kiate kimoutolu, ‘oku ‘ikai malu ia kiate kinautolu. Fakapapau‘i ‘e tali ‘e he feitu‘u ‘oku mou fetukutuku atu ki aí ho‘omou fanga monumanu lalatá. Pe ma‘u ‘a e ngaahi fakaikiiki ki he fetu‘utakí ki he ngaahi fale ta‘uhi‘anga fanga kulií, tauhi‘anga fanga pusí pea mo ha ngaahi mōtele ‘oku nau tali ‘a e fanga monumanu lalatá.