Te whakatika raru

He nui ngā take kāore pea koe e whiwhi i tētahi karere Matohi Waea Pūkoro Ohotata. E ākina ana te katoa e mātou kia whirinaki ki ngā tini ara kia whai mōhiohio.

Hihiratia mēnā rānei e āhei ana tō waea ki ngā Matohi Waea Pūkoro Ohotata. Ka kitea pea ki ō tautuhinga ā-waea. Ko tā mātou e whakapae nei, ka whiwhi te nuinga o ngā waea hokona i muri mai i te 2017 i ngā Matohi Waea Pūkoro Ohotata.

Me whai hoki tō waea i te irirangi waea pūkoro, me te pūmanawa kua whakahoungia hoki. Ehara i te mea me tikiake koe i tētahi taupānga, me whakauru rānei ki tētahi ratonga.

Ko ētahi atu take kāore pea koe e whiwhi ana i te matohi ko ēnei:

• kua weto tō waea
• kei te aratau rerenga, tērā rānei,
• kei waho koe i te whiwhinga irirangi waea pūkoro.

Mēnā i nekehia tō waea i tētahi whatunga 3G ki te 4G i te wā o te pāhotanga, kua whiwhi koe i tētahi matohi mai i ngā whatunga e rua. Kua pēnei hoki mēnā i whakakā, i whakaweto hoki koe i te aratau rerenga. Mēnā rānei i whakaweto, i whakakā anō koe i tō waea i te wā o te pāhotanga.

Kei ētahi waea e kā ana tētahi āhuatanga whakamahara e taea ana te tautuhi mō ngā matohi. Mā tēnei pea e putuputu rawa ā te waea whakatangi mai hei te wā o te pāhotanga. Ki te whai tō waea i tētahi whakamahara matohi ka kitea tērā ki ngā tautuhinga o te waea. Ka tapaina pea ēnei tautuhinga ko ngā Matohi Ahokore, ko ngā Matohi Pāhotanga, ko ngā Matohi Ohotata rānei.

Mēnā i whiwhi koe i tētahi Matohi Waea Pūkoro Ohotata, ka kitea tonutia pea ki tō waea.

Mō ngā waea Android

Ahakoa tērā, i te nuinga o te wā ka kitea ngā matohi ohotata ki tō taupānga ‘Messages’.

Hei tauira:

1.    Haere ki te taupānga Messages.

2.    Rapu i te tahua (...), ā, tīpakohia ‘ngā tautuhinga’ (settings).

3.    Tīpakohia ‘Hītori matohi ohotata’ (Emergency alert history).

Mō ngā waea Apple

Mō ngā kaiwhakamahi iPhone, kei ō whakamōhiotanga te matohi. Uru atu ki ō whakamōhiotanga mā te miri whakararo mai i runga i tō mata. Ki te muku koe i ō whakamōhiotanga, ka mukua hoki te matohi.

Kei te whakamahia e te pūnaha Matohi Waea Pūkoro Ohotata tētahi paerewa ā-ao. He nui te wā e kīia ana te hongere pāpāho e whakamahia ana e mātou te Presidential Alert kei tāwāhi.

Kua mahi tahi mātou ki ngā kaiwhakaputa waea, ki ngā kaiwhakahaere whatunga waea pūkoro hoki e whiua kē ai te rerenga Matohi Ohotata rānei. Heoi, ko ētahi waea ērā e whai tonu ana i te tikanga o Amerika, me te whakaatu mai nei i te rerenga Matohi Perehitene. Ka pēnā pea ina:

• hokona tō waea i mua atu i te 2017,
• tērā rānei i hokona tō waea i tāwāhi,
• tērā rānei i hokoroto whakararatia tō waea.

Kei te momo me te tauira o tō waea pūkoro te āhua o te āheinga ki ngā Matohi Waea Pūkoro Ohotata. Mēnā he taumatua rongo tōu, ka taea te whakariterite kia tangi te matohi mā tō taumatua rongo.

I ahu mai te tangi a Matohi Waea Pūkoro Ohotata i tētahi paerewa ā-ao. Ahakoa te whakamataku, te whakapōrearea rānei pea o te tangi, i āta kōwhiria kia whakarongo pīkari atu koe, he kawa nōna ki te taringa o te tangata.

Kei te momo me te tauira o tō waea pūkoro tana tangi mai, kore tangi mai rānei, i te wā o te karere matohi. Kāore ētahi kaiwhakaputa waea e tuku kia whakatuanuitia te aratau mū e ngā matohi ohotata.

Ina taraiwa koe, me neke atu tō waka ki te taha o te rori, me hihira te karere ā te wā tonu ka haumaru ana te pērā. Mēnā he pāhihi kei tō waka, tonoa ia kia pānui tangetange i te matohi. Kaua e ngana ki te pānui i te matohi i a koe e taraiwa ana.

Me pai te mahi a te Matohi Waea Pūkoro Ohotata ki ngā wāhi whai whiwhinga irirangi waea pūkoro. Tata ki te 97% o ngā wāhi kei reira ngā tāngata e noho ana ka whai whiwhinga irirangi waea pūkoro. E whāia ana e ngā kaiwhakarato whatunga waea pūkoro te whakapai i te hōkaitanga pūkoro i ngā wā katoa.

Ka whakamahia e Matohi Waea Pūkoro Ohotata te irirangi waea pūkoro, ka mutu, kāore e whakapāho atu mā te waeatanga ahokore.

Ka whakamahi a Matohi Waea Pūkoro Ohotata i ngā whatunga waea pūkoro o Aotearoa. Ka taea anake te whakapāho i ngā matohi ki ngā waea pūkoro e āhei ana te whiwhi i ērā.

E whiwhi ai koe i tētahi Matohi Waea Pūkoro Ohotata me mātua whai irirangi waea pūkoro koe. I tēnei wā ka taea anake e Starlink te tuku tūhonohono ipurangi, kaua te irirangi waea pūkoro. E mōhio ana mātau kei te mahi a Starlink kia taea ai te ratonga waea pūkoro. E mōhio ana mātau ki tētahi atu kaiwhakarato amiorangi (Lynk World) e whakarato kē ana i tēnei.

He utukore te whiwhi i ngā Matohi Waea Pūkoro Ohotata. Kāore he utu ki a koe. Ehara i te mea me tikiake koe i tētahi taupānga, me whakauru rānei ki tētahi ratonga