Pohewatia te kore wai mō te toru rā, neke atu rānei. Ka pēhea tō horoi tinana, tō tunu kai, tō horoi anō hoki? Ka inu koe i te aha?
Ka pāngia pea ngā ratonga wai hei te ohotata. Me whai putunga wai mō te toru rā, neke atu rānei.
Pupuritia ō pounamu wai, inu mirumiru kua pōaha, ā, horoia, whakakīia ki te wai. Kia toru rita wai mō ia tangata, mō ia rā e korekore ana te wai. Kaua e whakamahi i ngā pounamu miraka. He uaua te horoi, ā, ka māuiui pea koe. Kaua e wareware ki te whakaputu i te wai mō ngā pēpi, mō ngā mōkai.
Ka taea te mau tonu i te wai inu kua whakaputuhia mō te tae atu ki te tau kotahi ki te tāpiri koe i te matū whakakōmā ā-kāinga. Whakamahia te haurua tīpune mō ia tekau rita wai, ā, kaua e inumia mō te haurua hāora i te itinga iho ā muri i te whakaranu. Tuhi tapanga ki ia pounamu me te rā i whakakīia. Whakaputuhia ngā pounamu ki tētahi wāhi kōangiangi, pōuri hoki.
Kia maumahara ki te whakaputu wai mō te tunu kai, mō te horoi hoki. Ka taea te whakamahi i te wai ki tō puoto wai wera, engari whakaputuhia ētahi atu wai ki ngā ipu kirihou rahi.
Ka taea hoki te whakakī ipu aihikirīmi kirihou ki te wai, me te pupuri i ērā ki te pouaka tio. Ka āwhina pea ēnei kia mātao tonu te kai ki te weto te hiko, ā, ka whakamahia hoki hei inu.